ភ្នំពេញ៖ គយកម្ពុជាបន្ធូរបន្ថយពន្ធ ១០%ដល់ឡានគេចពន្ធទាំងអស់ ដើម្បីឱ្យមកបំពេញកាតាព្វកិច្ចពន្ធឱ្យបានត្រឹមចុងឆ្នាំនេះ។

ក្នុងសេចក្តីជូនដំណឹងចុះថ្ងៃទី ៩ កញ្ញា ឆ្នាំ២០២១ អគ្គនាយកដ្ឋានគយ និងរដ្ឋាករ បានបញ្ជាទៅមន្ត្រីទាំងអស់ឱ្យផ្អាកសកម្មភាពបង្ក្រាបយានយន្តគេចពន្ធដែលមានភូមិសាស្ត្រក្នុងប្រទេសមួយរយៈ លើកលែងតែនៅតាមតំបន់ព្រំដែន ដើម្បីទុកពេលឱ្យឡានដែលជ្រកក្រោមផ្លាកលេខផ្សេងៗ និងមិនទាន់មានពន្ធទាំងអស់ចូលមកអនុវត្តន៍កាតាព្វកិច្ចបង់ពន្ធ។

លើសពីនោះដើម្បីលើកទឹកចិត្តឱ្យម្ចាស់យាន្តយន្តចូលមកបំពេញកាតាព្វកិច្ចពន្ធ គយបានបន្ធូរបន្ថយពន្ធ១០% នៃប្រាក់បង់ពន្ធសរុប ត្រឹមថ្ងៃទី៣១ ខែធ្នូ ឆ្នាំ២០២១។

គយបានលើកឡើងថា៖ « ចាប់ពីថ្ងៃទី១ ខែមករា ឆ្នាំ២០២២២ រហូតដល់ថ្ងៃទី៣០ ខែមិថុនា ឆ្នាំ២០២២ ដែលជាថ្ងៃឱសានវាទចុងក្រោយ នៃការអនុញ្ញាតឱ្យចូលខ្លួនមកបង់ពន្ធ ម្ចាស់យានយន្តត្រូវបំពេញភារកិច្ចពន្ធ និងអាករពេញលេញដោយគ្មានការអនុគ្រោះបន្ធូរបន្ថយពន្ធឡើយ » ។

ចំពោះរថយន្តចង្កូតស្ដាំវិញត្រូវមកតម្កល់ប្រាក់កក់ស្មើ និងប្រាក់ពន្ធ និងអាករសរុបដក១០% មុននឹងយករថយន្តទៅកែចង្កូតពីស្ដាំទៅឆ្វេងឱ្យបានយ៉ាងយូរបំផុតត្រឹមថ្ងៃទី ៣០ ខែមិថុនា ឆ្នាំ២០២២។

បើតាមអគ្គនាយកដ្ឋានគយ ចាប់ពីថ្ងៃទី១ ខែកក្កដា ឆ្នាំ២០២២ រថយន្តដែលគ្មានពន្ធប្រសិនជាត្រូវបង្ក្រាបបាន នឹងតម្រូវឱ្យបង់ពន្ធ បូកទាំងប្រាក់ពិន័យថែមទៀត ខណៈឡានចង្កូតស្ដាំ និងត្រូវយកទៅកម្ទេចចោល ឬដោះបំបែកគ្រឿងបន្លាស់៕